عندك آلام اسفل الضهر وبتحس ان ضهرك قافش عليك جامد ؟ و بتلاقى كمان ان فيه وجع مسمع في رجلك سواء كانت رجل واحدة او الاتنين ، بس بعد فترة بدأت تلاحظ ان وجع رجلك بقى اكثر من وجع ضهرك
طيب خلي بالك عشان الوجع ده ممكن يكون بسبب مشكلة في العمود الفقري واللي هي الإنزلاق الغضروفي القطني
وخلينا نعرف بكل بساطة أي هو الانزلاق الغضروفي القطني واي هي الفقرات القطنية .
اي هي الفقرات القطنية
الفقرات القطنية هي جزء من عمودنا الفقري ، و اللي بتكون موجودة في آخر الضهر ، يعني لو حطيت ايدك على آخر ضهرك فإنت كدا وصلت للفقرات القطنية ، والفقرات دي بما انها موجوده في آخر الضهر فهي تعتبر أساس العمود الفقري كله ، وده عشان هي اكتر فقرات في العمود الفقري بتتحمل وزن الجسم كله و كمان بتتحمل الضغط اللى بيتعرضله عمودنا الفقري بسبب الانشطة اللى بنعملها فى يومنا .
و بعد ما عرفنا اى هى الفقرات القطنية ، تعالوا نعرف
اي هو الغضروف؟
الغضروف دا ببساطة هو حاجة كده زي المخدة الطرية و اللى بيتكون من جزئين
- الجزء الأول هي المادة الجيلاتينية اللي بتكون موجودة في نص الغضروف ، و بتكون مسؤولة انها تمتص الصدمات اللي بيتعرضلها العمود الفقري .
- أما الجزء التاني وهو الألياف اللي بتكون حوالين المادة الجيلاتينية ، و الألياف دى وظيفتها انها تحبس المادة الجيلاتينية في مكانها و تخليها متتحركش أو تخرج من مكانها ، وده لانها مادة كاوية لو خرجت بره الغضروف هتضر بالحبل الشوكي و الأعصاب الموجودة في العمود الفقري .
و الغضاريف دى بتكون موجوده بين كل فقرة و التانيه فى عمودنا الفقري ، و دورها انها تحمي الفقرات من انها تحتك ببعضها ، ده غير ان الغضاريف دي زى ما قولنا من شوية هي اللى بتمتص الصدمات و الضغط اللى بيتعرضله العمود الفقري و توزعه على كل فقرات العمود الفقري بالتساوى عشان ميبقاش فيه فقرة بتتعرض للضغط بشكل اكبر من التانيه ، وكمان هي اللي بتساعدنا اننا نحرك ضهرنا يمين و شمال من غير ما نضر الفقرات .
و بعد ما عرفنا يعنى اى غضروف و اى هى وظيفته ، خلينا نعرف دلوقتى اى اللى ممكن يحصل لو الماده الجيلاتينيه اللى جوا الغضروف اتحركت من مكانها ؟
الماده دى لو اتحركت من مكانها هتكون بتعملنا المشكلة اللي اتكلمنا عنها من شويه و اللي هي الانزلاق الغضروفي القطني
و بسبب حركة الماده الجيلاتينيه هتبدأ انها تزق الالياف اللى حواليها لبره ، و من كتر ضغط المادة الجيلاتينية على الالياف ، هتبدأ الألياف دى تضعف و هيحصل فيها تشققات ، و مع زيادة الضغط على الغضروف بسبب المجهود اللى بنعمله كل يوم او شيلنا لحاجات تقيله هتبدأ الماده الجيلاتينيه تخرج اكتر من مكانها ، وده هيضر زى ما قولنا من شوية بالحبل الشوكي وجذور الأعصاب اللى بتطلع منه
و الانزلاق ده لو حصل ، الماده الجيلاتينيه اما انها هتضغط على الحبل الشوكي نفسه من النص أو انها هتضغط على جذور الأعصاب
وساعتها هتبدأ الأعراض انها تظهر ، بس قبل ما نتكلم عن الأعراض لازم نعرف حاجة مهمة جدا وهي ان الإنزلاق الغضروفي بيكون ليه 4 درجات وكل ما الدرجات دي زادت كل ما الأعراض زادت:
اي هي درجات الانزلاق الغضروفي القطني ؟
الدرجة الأولى اللي هي انتفاخ الغضروف ، وهنا المادة الجيلاتينة بدأت تتحرك من مكانها بشكل بسيط وتضغط على الحلقات الليفية ، بس لسه الانزلاق دا مقربش من الحبل الشوكي أو جذور الأعصاب.
الدرجة التانية واللي هي بروز الغضروف ، و في الدرجة دي بتبدأ تحصل تشققات فى الألياف من كتر ضغط الماده الجيلاتينيه عليها ، وده بيخلى الماده الجيلاتينيه تخرج لبره اكتر ، ومن هنا بيبدأ الإنزلاق انه يضغط على الأعصاب
أما الدرجة التالتة ودى بنسميها خروج الغضروف ، وهنا الحلقات الليفية بتكون اتقطعت بشكل كامل وبدأ بروز الماده الجيلاتينيه انه يضغط على الأعصاب ويأثر على وظيفتها الحركية
الدرجة الرابعة واللي هي انفجار الغضروف : ودي تعتبر من اسوأ درجات الانزلاق الغضروفى وده لان الماده الجيلاتينيه بتكون خرجت برا الغضروف بشكل كلي و وصلت للأعصاب والقناة الشوكية ، و المادة دي زي ما قلنا بتكون مادة الكاويه ، وفساعتها ممكن تسبب ضرر و التهابات كبيرة جدا للأعصاب ، و هنا هنكون بنحس بألم كبير جدا وكمان هنحس بلسعة فى الظهر كله بتوصل للمؤخره و الساقين .
وخلينا نعرف دلوقتي
اي هي أعراض الانزلاق الغضروفي القطني؟
- هنحس بألم في أسفل الضهر
- او هنحس بنار أو سيخ ماشي في رجل واحده او الرجلين من اول الفخد لغاية صوابع الرجل
- و ممكن كمان نحس بتنميل او تخدير أو شكشكة في الرجل
- او نحس بأعراض عرق النسا
- او نحس بصعوبة فى المشي أو الحركة.
و هنا لازم نعرف حاجة مهمة ، وهي اننا لازم اول ما نبدأ نحس بالاعراض اللى قولناها دى ، ناخد خطوة الكشف و العلاج ، لان ده لو محصلش الاعراض اللى بنحس بيها مش هتقف عند وجع الضهر او التنميل فى الرجل و صعوبة الحركة ، دى ممكن توصل لحاجات تانية زى
- اننا منبقاش قادرين اننا نرفع وش رجلنا من على الارض و احنا ماشين ، و ده بنسميه سقوط فى القدم .
- او اننا بقينا نلاقى ان فيه صعوبة أو عدم تحكم في البول او البراز ، فبلاش نتأخر فى العلاج و نوصل لكده